كلمات قصيدة ذوله خوتهم صدك مسلم الوائلي مكتوبة كاملة
📜 القصيدة : ذوله خوتهم صدگ
🎤 أداء: مسلم الوائلي
🖋 كلمات: محمد رسول الحميري
~~
ربعي بكل خلايا الدم .. الهم موقف وثايه
گالوا خويه لا تهتم .. ما توگعلك احجايه
والتفرضه ... عليه نرضه
~~
عابس بعز الهوه
ذب الهدوم ونوه
ننذبح بالطف سوه .. ما رجف لا
اتخذ ليلك جمل
گتله لكن ما قبل
احنه ربعك لو أهل .. أهلي والله
نخيت المو نحس طبعه
صحت يا حارس البضعه
نذر روحه وشمر درعه .. محلاه
جنونك قدوة للعاقل
ضميرك للحرب نازل
وحق جفوف ابو فاضل .. أهواه
كون اليعشگ وينجن .. هذا الينقبل عشگه
معذور الگلب لو حن .. سيف ابنادم الفرگه
عشگ مرضه .. عليه نرضه
~
حگي أسولف بالربع
صاروا الزينب درع
شيخ الأنصار السبع .. الله حياه
گلها عد عينج زلم
مو حبيب الينهزم
هيه گالت والنعم .. زلمه تنخاه
بشر يستاهل انقدره
ونسجله بدفتر الزهره
واگعده بصفه بالحضره .. وياه
بخت مو شيبه عاديه
مجاهد ميه بالميه
يگلي الدنيه مگضيه .. مولاي
گالوا شايب ومن هد .. مشه المعركه بكيفه
هذا الما دخلها ورد .. إلا ومنثلم سيفه
يرب حفظه .. عليه نرضه
~~~~
واضح وما ينخفي
موقف الحر الوفي
كون اذكره واكتفي .. گلبه دلاه
احجي عن الكاهلي
لو شبيب النهشلي
هذا يتنفس علي .. يهوه مولاه
كنانه الثغلبي اتقدم
وصل يم زينب وسلم
اخوتي و وقعوا بالدم .. والله
يزيد العبدي ما قصر
بعدني بمكه وتحضر
حلفلي يحامي عالخدر .. بدماه
بيهم رافع الأزدي .. بيهم نافع وعامر
بيهم سالم العبدي .. بيهم مسلم الطاهر
والتحفظه .. عليه نرضه
~~
ذوله خوتهم صدگ
ذوله دلالي اليدگ
أجمل واطهر عشگ .. احنه عشناه
الله قرر ننجمع
والتقينه بهالوضع
يختلط دم الربع .. احنه ردناه
زلم ما رخصوا بيه
ولا خانتهم النيه
زلم گالولي مگضيه .. لتحير
حلاة اليوگع بشده
مثل هاي الربع عنده
ربع ما ممكن اترده .. شيصير
تنخاهم يجيك الرد .. تبشر يا هوه الريه
واحدهم بالف ينعد .. نزفوا يمي حنيه
على لحظه .. عليه نرضه
~~~~
طبع اليخون الملح
اعوج وما ينصلح
يبتسم من تنجرح .. هذا تلگاه
وانه خاويت الشهم
والمقدس والمهم
انصه واحد عالنجم .. الله علاه
لگيت التركي والطائي
لگيت الحضرمي الواعي
لگيت اليلزم شراعي .. لو طاح
لگيت الغيره بنصاري
اخوتي وأعظم أسراري
اجوني وأمنت ثاري .. ما راح
ركضوا ركضت الينجن .. من يحشمه محبوبه
ما گالوا نموت ألمن .. ذيج الليله مكتوبه
والنعوضه .. عليه نرضه