كلمات قصيدة علي مات محمد الجنامي مكتوبه كامله
لطمية علي مات محمد الجنامي بالكلمات مكتوبة كاملة
قصيدة :- علي مات .
كلمات :- الشاعر وسام الشويلي .
أداء :- الرادود محمد الجنامي .
🖤🍀🍀🖤🍀🍀🖤
عـلـي مـات ... حــرامـات
والـدنيه بعـده اصبــحت كئيــبه
فـگــدنـــاه ... خــسـرنــاه
عيشتنه صارت فاجعه و مصيبه
🖤🍀🍀🖤🍀🍀🖤
ارض وسمه الناعي نعه .. طاحت علينه الفاجعه
و مصيبه جبيره
ياحزن ياهم ينجلي .. والموت اخذ منه علي
الابو الكله غيره
ذبو العمايم عالارض .. يهل الفرض مات الفرض
تحتم مصيره
راح اليعـدل المايله .. راح اليحل المعضله
الحفظنه بضميره
ابو حسين ... يصيح وين
واحد شبيهه ومثله هيچي هيبه
فـگــدنـــاه ... خــسـرنــاه
عيشتنه صارت فاجعه و مصــيبه
🖤🍀🍀🖤🍀🍀🖤
صوت وزرع بينه الالم .. حامي الحمه سوره نهدم
بعد من يلمنه
ريج اليحب حيدر يبس .. مخنوگ وبدور النفس
هواه انحرمنه
لون اليتامه منخطف .. واگلوبهم ترجف رجف
لابو الماكو يمنه
للفقره صوت ويعتلي .. شنهي الحياة بلا علي
تـزايـد الـمـنه
الابـــو راح ... والافــراح
ايـسـنـه مـنـهـا مـن بـده مـغيبـه
فـگــدنـــاه ... خــسـرنــاه
عيشتنه صارت فاجعه و مصيبه
🖤🍀🍀🖤🍀🍀🖤
آه ياعلي ويا فرگته .. من هسه احنه بغيبته
اسمنه اليتامه
چـان الامان البي نحس .. بعده الوكت يفتر عكس
فگدنه السلامه
بعيونه لوجهه عطش .. نركض صفينه عله النعش
بدموع الملامه
عايفنه ابحضان الجرح .. وحچـاية الشامت ملح
لچـمنـه كلامه
يـشـمـتـون ... يـفـرحـون
واحـنـه گلبنه مـا وگـف نـحـيـبه
فـگــدنـــاه ... خــسـرنــاه
عيشتنه صارت فاجعه و مصيبه
🖤🍀🍀🖤🍀🍀🖤
اليفگد علي يفگد وطن .. وايظل غريب ابهالزمان
تنهشه الذيابه
ينتهي الما عنده سند .. وبلا علي صعبه الشدد
ترى الدنيا غابه
الشـايل ابوه للمگبره .. ايده تظل فوگ الظهره
يـنوح بغيابه
كل وكته مشتاگ ويحن .. عايش لچن ميت حزن
يـكـابد مصابه
عـلـي غـاب ... بـلـمـصاب
مـن هـسـه زينب تـنحسب غريبه
فـگــدنـــاه ... خــسـرنــاه
عيشتنــه صارت فاجعه و مصيبه
🖤🍀🍀🖤🍀🍀🖤
عيد الفطر يومه وصل .. تتعايد الوادم تظل
يحسرتنه زيدي
گلب العقيله ينشلع .. باجر تـنادي بالدمع
انه وينه عيدي
تتصافح الناس بهنه .. وانه حزينه مدوهنه
يبس دم وريدي
تجرحني يا عيد الفطر .. والدي نايم بالگبر
امد المن ايدي
تــرى الــعـيـد ... ابـو يــريـد
والـفـارگ احـبـابـه البـچـي نصيبه
فـگــدنـــاه ... خــسـرنــاه
عيشتنــه صـارت فاجـعه و مصيبه