كلمات قصيدة العمر شيفيد الرادود باسم الكربلائي مكتوبة كاملة
العمر شيفيد
للشاعر: السيد عبدالخالق المحنه
-----------
رضيت و دهري ما يرضه...حبيبي النبضي وي نبضه
يريد ايروح
مضه سهم القدر ومضه...أخويه و محد يعوضه
يريد يروح
العمر شيفيد...و أخويه ابعيد
***
يبو محمد أخوك آنا الحبيب حسين
نويت اعله السفر جنك ينور العين
گلب حيدر مثل سيف الإلـه حدين
نعم احنه ابغمد واحد لجن سيفين
أخو مثلك بعد يحصل أجيب امنين
إذا انت ارحلت عني أروحن وين
يخي هونك يخي هونك...العمر ما يسوه من دونك
يا ضي عيناي
دمع عيني خطف لونك...تريد اتغمض اعيونك
يا ضي عيناي
عمر ما ريد...و أخويه ابعيد
***
يخويه اليفگد ابن أمه زمانه ايجور
يكابر حته لو كابر يظل مكسور
يظل ابصحوته و نومه يزور اقبور
إذا يبجي رمش عينه تره معذور
لون بيدي يصح موتك إليه ايدور
صفر شهرك يبو القاسم ولي عاشور
سكن ونك سكن ونك...نويت اعله السفر جنك
يبعد الروح
شجاوب للنشد عنك...جروحه مني لو منك
يبعد الروح
يموت العيد...و أخويه ابعيد
***
الأخو من هيبة إخوانه يظل ينهاب
اليعيش ابلا إخو محد حسب له إحساب
عمت عين التراب اشگد دفن أحباب
مثل إبن أمي يا وسفه يضمه اتراب
لون يسوه الزمن عتبه أسمعه اعتاب
عشت من الزغر و أبجي عله الغياب
يموت الغالي و الأقرب...لجن فگد الإخو يصعب
ألف ويلاه
كسر ظهري و بقيت أنحب...صحت يا موتي ما تگرب
ألف ويلاه
لويت الجيد...و أخويه ابعيد
***
أشوفك من إجت زينب شلت يمناك
صحت شيل الطشت عني يخويه أرجاك
خفت لا إختك تشوفه تظل تنعاك
هله بالغالية اتگلها رغم بلواك
أطمنك زينبك بالطف تشوف إدماك
و أطمنك عن عرس جاسم يصير هناك
إذا تگدر إذا تگدر...أريد بكربله تحضر
عرس جسام
تزفه الحومه و العسكر...أظن سبعين الف و أكثر
عرس جسام
و أظل اوحيد...و أخويه ابعيد
***
و حقك لنتحب و أنعه مسه و مصباح
دغمض عينك و إرحل يخي و إرتاح
و أگولن عالأقل بيدي دفنته و راح
و لا گاعد على صدرك شفت ذبّاح
و لا على راسك يبعد أهلي تشيله إرماح
أظن ما سامع اجنازه بلايه اصياح
أنا يمك أنا يمك...و لا حافر يمس جسمك
و حگ عيناك
أبد ما ينسلب هدمك...المصايب خلها لابن أمك
و حگ عيناك
بلايه اوريد...و أخويه ابعيد
***
أغسلك بيدي و بلحدك أگلك نام
لأن آني أظل عاري ثلثتيام
بوجودي سالمة اعيالك و لا تنضام
بناتك آني والدهن و لا أيتام
إذا آني غبت صارت حزن و آلالام
بنات الزهرة بغيابي بلايه اخيام
و لا ريدك و لا ريدك...تشاهد ذبحة اعضيدك
عالمسناة
طفل ما ينذبح بإيدك...صريع و إختك اتريدك
عالمسناة
أريد اعضيد...و أخويه ابعيد
***
رحت يبن أمي و اخوانك عليك اتنوح
يبو محمد على نعشك علمنه ايلوح
و لا مثلي عله الغبره تظل مطروح
تصيح اعيالي أسمعها و أنا مذبوح
صعوبة اعله الرجل يترك حرم و يروح
بيدين الگلبه ما يرحم و لا بيه روح
تروح انت تروح انته...عليّ حمل الصعب عفته
أنا المسئول
أنا اليسمع صراخ إخته...و أنا الينظر دمع بنته
أنا المسئول
قطيع الإيد...و أخويه ابعيد