كلمات لطمية يا هلي محمد الجنامي

 كلمات قصيدة يا هلي محمد الجنامي مكتوبة كاملة

- قصيدة :- يا هلي . 
- كلمات :- الشاعر كرار حسين الكربلائي . 
- أداء :- الرادود محمد الجنامي . 
----------
يا هلي هالليله زينب يمكم مدللـه
يا هلي باچر غريبه لوحدي بكربله
يا هلي باچر خدرنه بغربه محد إله
-----------
الليل لمن يمشي ساعه من العمر ياخذ سنه
گبل ما تمشون عني يهلي احس ظهري انحنه
باچر تخلوني وحدي بالعيال مدوهنه
الموت خل ياخذني يمكم موش اخيتكم انه

وحدي باچر اظل بلا اهل بالغرب
وحدي المن تحشم دمعتي من تصب
وحدي والموت اله رحمه اليفارگ هله
-------------
باچر تموتون كلهم يا بعد كل العمر
حسين يبقه لوحده وانه بيدي اقدمله المهر
ينذبح جدام عيني يوم عاشور الظهر
ريحة امي اضلوع صدره بالحوافر تنكسر

ينذبح باچر عزيز ام الحسن ينذبح
ينذبح مو راسه گلبي الينرفع عالرمح
ينذبح محد يچفنه ومحد يغسله
------------
تحترگ باچر خيمنه وراح اظل بلا خيم
صوتي بي دخان واصرخ وين شيّال العلم
من النهر اسمع جوابه بعيني مكسور السهم
گطعو جفوفي يخيتي وبالعمد راسي انهشم

كافلي باچر يطيح اعله النهر كافلي
كافلي  عدوانه تحرگ خيمتي ومحملي
كافلي من بعده يحدي بالضعن حرمله
------------
مثل هذا الوكت باچر والله غربه غربتي
لا خيم لا اهل عندي وعالترابه گعدتي
لو صحت حيكم يخوتي ما يفزعون اخوتي
مذبحين وعاذرتهم وارخصلهم دمعتي

بحيرتي يا ليلة الوحشه شكثر مرعبه
بحيرتي وانه غريبه واخوتي مسلبه
بحيرتي يبقالي همي ودمعتي الهامله
------------
يوم عاشر صعب عندي واهدعش اكثر صعب
اخت ابو فاضل وتالي تشوفني عيون الغرب
تنچتف بالحبل زينب وبمتنها تنضرب
بناكه ما فوگها هودج للسبي تكطع درب

انسبي انه اخت ابو فاضل صعب انسبي
انسبي واليحدي نوگ اهل الشرف اجنبي
انسبي وانظر عليل برگبته السلسله

اعلانات الكاتب




حجم الخط
+
16
-
تباعد السطور
+
2
-