كلمات قصيدة سولف يكلبي رضا الاراكي مكتوبة كاملة
قصيدة : سولف يكلبي
الرادود : رضا الاراكي
الشاعر : شاكر الصيمري
~
صلى الله عليك يا حسين
~~
سولف يكلبي . . وابدي الندامه
كعبة جروحك . . حسين وخيامه
جا يمته نبضك . . ينزف هيامه
جرحك طهاره . . مابي ملامه
ياكلبي ابجيله تره حسين
محد باجيله ولا عين
يوم الضل مطروح ايام
راحت عنه اخته بالونين
ابجي اله .. واسهر ليلك
ابجي اله .. من كل حيلك
ابجي اله .. غير الضامي
ابجي اله .. مايعنيلك
~
ياروحي زيدي . . بوني ونحيبي
كلمن نصيبه . . الدمعه نصيبي
ماتطفه بيه . . جمرة حبيبي
كون اعله حزنه . . يخضبني شيبي
والوادم تبجي على الراح
شيسوي العنده خدر طاح
عذرا مامتنه على حسين
من نسمع راسه عله ارماح
سيدي .. رمحك بينه
سيدي .. وياذينه
سيدي .. بس امصابك
سيدي .. يبجينه
~
بيك انه قاصر . . مو كد نعمتك
كل ما هنالك . . عاشك خدمتك
يجبني حبك . . واشهك رحمتك
كل نضره توهم . . إله نضرتك
تاخذني النضره للخيام
وتعيشني اجواء الشام
والكه ضعونك بين الناس
زينب محتاره بالايتام
ماعشت .. دون عيونك
ماعشت .. غير اضعونك
ماعشت .. الا بجرحك
ماعشت .. دنيا ابدونك
~
عاشك سوادك . . عشك الثواكل
بطاريك ادنك . . مثل السنابل
انه اعله دينك . . تطردني قابل
بس اعله بابك . . خليني احاول
ماريد الدنيا بلا نوح
ياربي احزاني والجروح
اهواك واهوى شكو خيام
روح الماتهوى فلا روح
روحي الك .. انته البيهه
روحي الك .. ماوصيهه
روحي الك .. والمملوكه
روحي الك .. ياراعيهه
~~~~
روحك مدينه . . ما الها تالي
حزنك سعاده . . عاش بخيالي
بس العزائك . . يسرحله بالي
درب المجالس . . غيرلي حالي
ماعندي حجايه ولا راي
اخذ البعيوني شكو ماي
بيدك خليني يمولاي
بيدك خليني يمولاي
ياوطن .. لهل الغيره
ياوطن .. واجمل ديره
ياوطن .. لم خدامه
ياوطن .. عشنه بخيره